ஏதோ ஒரு எண்ணம்
ஏதோ ஒரு ஏக்கம்
என்னுள் சுற்றிய நான்
கிரகிக்க முடியாத கிரகம்
தோராயணம் அறியாத
துல்லியம்
நீள் அகலப் பாதைகளில்
எனக்கு நான் கண்ட
நிதர்சனம்
அங்குலங்கள் நகர்ந்த
பொழுதுகளில்
என் சுயங்கள் தொலைந்த
பூகோளம்
சுதந்திரம் இருந்தும்
முடங்கிய கைதியாய்
சுற்றிடும் கோள்களில்
சோதனைச் சரித்திரம்
ஒரே வழியில்
ஒரே பயணம்.
பச்சோந்தி போல்
பல அரிதாரம்
என்னைக் காணத்
தேடிய ஆடிகள்
பிறவியின் ஆழியில்
வெவ்வேறு பிம்பங்களாய்
என்னை நான் வேஷித்தேன்
அன்னையின் மடிவிட்ட
நொடி முதலாய்
தொடங்கிய
அழுகையும் ஏக்கமும்
வாழ்க்கைத் தின்னை
விட்டகலும் வரை...
அடையாளங்கள் காட்டிய
ஆடிகளின் பிரதிபலிப்பில்
எரிகின்ற சுடராய்
என் ஆத்மா...
சுயத்தின் சாலைகளில்
என் தேடலின்
அறிகுறியாய்
ஏதோ ஒரு எண்ணம்
ஏதோ ஒரு ஏக்கம்
என்னுள் சுற்றிய நான்
கிரகிக்க முடியாத கிரகம்
ஆதியும் இல்லாமல்...
அந்தமும் இல்லாமல்...
....................முகில்
No comments:
Post a Comment